الشاعر جمعه معيشي الخميس
ابو معيشي
زماني جرد اسيوفه وسنهه
عليه اوحرمت عيني وسنهه
وحك اللي فرض خمسه وسنهه
بعد هيهات عيش ايصير اليه
ابجليب اظلم تذب ارشاك ودلاك
ولا صحلك صديج ارشدك ودلاك
ولا كلمن توده صار ودلاك
ابكلبه ولا صفتله اوياك نيه
يهاشم ناشد العالم وساليت
عليك وهملت اعيوني وساليت
حسب ظنك نسيت انه وساليت
وراسك بالوسن تطري عليه
وحك من خالج النيران واراك
المصايب نحلتلي الحيل واراك
بعد يوم الحشر وحساب وراك
والاعظم سنسله ام سبعين اذيه
جفوني اللي يحب كلبي وردهم
حادي البل سمع وني وردهم
صار العرب يمعيجل وردهم
من دمعي اليكت فوك الوطيه
ياهو المرسلك للبيض وداك
اظن هاوي عذاب الروح وداك
ماينبت يحجي سعود وداك
معاهن تنغلب وتعم عليه
وحك اللي كرب كوسين وادنه
ثبت يسعود وي البيض ودنه
ان متت مغرم ابحضن البيض ودنه
تفوز وتحسب الجنه الهويه
هواهن حمس اجلا نه وكلهن
يخي منهاب مدفعهن وكلهن
ماتكدر تبارحهن وكلهن
لبو معيشي اعتنن جيمن عزيه
ماساعه كعد وياي وناس
الغيري استاد خف الجدم وناس
مثل اللي حطبهه احجار وناس
هيجي النه كلب ناره سريه
ولو كلبي بهواهن نار ويلاي
عنهن عيب اروح ابعيد ويلاي
يصالح لو لفاني الموت ويلاي
انت والبيض دك ولطم عليه
ابد ماتم فكر عندي ولاراي
ولا مزنه اشبهت دمعي ولا راي
فديت العين والجبده ولاراي
هيجي انه العلي واجب عليه
اصبحت لا اسوكن ابزملي ولحدي
امحير جني البومه ولحدي
يعل متوسد بكبري ولحدي
اشوه ولا يمر شامت عليه
المصايب لولفن للحيد يدهن
مثل مكر النسه على الرجل يدهن
وحك الزاجيات وشرف يدهن
يذلن كل شخص بيه الحميه
اشمالك يازماني علي صليت
ابنار وحمسيت اجلاي صليت
مثل ما صلت ام عمران صليت
دوخني الهوه وذبني بنويه
منتقول لعيون الشباب